كانت هتفرق في الوداع

لو بس كنت ساعتها عارف
إن دي المرة الاخيرة
ميه ميه
كانت هتفرق في الوداع

كنت هحضن سندس اللي ف تانية تالت ع المشاع
واحنا طالعين م اللجان
بعد اخر امتحان
و اسألها لو بتشوف فلان
طب فاهمه مادة ميس ايمان؟
طب ينفع ابقي اجيلكوا عادي ؟
قصدي يعني البيت يساع؟
لو بس كنت ساعتها عارف
إن دي المرة الاخيرة
ميه ميه
كانت هتفرق في الوداع

كنت يومها أكيد حبيّت
عند جدي ف شقته
نلعب ورق
نسهر سوا
ومش حسيبه عشان ينام ليلتها من بعد الدوا
أو يرد الشيش عشان ضهره بيتعب م الهوا
واقوله يعني بذمتك
اخر نفس ساقع اخدته ف صحتك
بقي مايساويش حبة وجع ؟

بطل دلع …

جدي اللي مات دفيان ليلتها بـاللحاف
لو كان عرف
إن الليلادي وداع لانفاس الهوا
مكنش رد الشيش ف اخر ليله له
ومكنش خاف

كل الشوارع والمباني
اللي مش حدخلها تاني
والاغاني
اللي لما سمعتها دندنتها
من مرة واحدة بالسماع
ميه ميه
كانت هتفرق في الوداع

يا كل حاجة كسبتها
أو سبتها
و ملحقتش اشبع منّها
اكمنّها
قالت "حنروح من بعض فين؟ "
يا ناس يا عبط يا عشمانين
ف فرصة تانية للقا
بطلوا اوهام بقي
وكفاية أحلام واسمعوا
عيشوا بذمة و ودعوا
كل حاجة بتعملوها
وكل حد بتشوفوه
وكل كلمة بتقولوها
وكل لحن بتسمعوه
عيشوا المشاهد
كل مشهد
زي مايكون الأخير
واشبعوا ساعة الوداع

واحضنوا الحاجة بـضمير
دا اللي فاضل مش كتير
اللي فاضل
مش كتير ..
---------

من ديوان ويسترن يونيون
للشاعر مصطفى ابراهيم ..

كلنا بلالين

فى حاجات علشان نعرف درجه قوتها بنكسرها
وحاجات ف ادينا علشان نعرف اننا عاوزنها بنخسرها
كدبت ف عمرك كام صاحب علشان كان نفسك تطمن
وخسرت اصحابك واطمنت
طب كام بلون فرقعوا منك وانت بتنفخهم على الاخر
...وعرفت اخرهم بس ندمت
دلوقتى فهمت انا عاوز ايه
انا كنت بفرقع بلالين ليه
انا عاوز حاجه بدون اخر او حتى باخر موصلوش
كام حيطه ف ضهرى اضرب واهرى ف بدنهم بس ميتهدوش
شئ مش مغشوش مضمون دايما من غير ما احتاج انى اتاكد
او حتى اخاف انى اتنكد ليكون ف الاخر برضه فاشوش
يا بشر عارفانى وعارفه انا مين
بلغوا اسفى لكل البلالين
كلنا كنا ف يوم بلونه وفقعتنا تجارب بنى ادمين
بلالين عايشين نفسها تلقى
حد يصدق ويقدرها ويتأكد من انه عاوزها
من غير ما يجرب يخسرها
------------------------------

" البالونه "
من ديوان ويسترن يونيون
للشاعر مصطفى ابراهيم ..